Un País en Comun

#unpaisencomu

Qui èm?

Èm gent comuna que viem de pertot e que mos auem junhut maugrat er isolament que mos volien bèri uns. Credem qu’era politica ei eth dret de decidí’c tot, per açò èm sobeirans e sabem qu’èm era majoritat. Totun, se nosati non hèm politica, seràn es elèits que la haràn per nosati, per aquerò èm decididi a èster un aute còp protagonistes.

Qué volem?

Viuem temps de cambiaments prigonds. Ei un cambiament culturau, de valors, de prioritats e de manères de hèr. Es demanes entà méter fin ara corrupcion e bastir naues institucions, mès transparentes e democratiques jamès non auien estat tan majoritàries coma ara. Mos afrontam a ua creishenta inegalitat sociau en Catalonha tota, e mos la cau combàter en tot méter es recorsi comuns ath servici de toti, e non de dera minoritat abituau. Era qualitat dera democracia d’un país se mesure pera qualitat des sòns servicis publics e volem èster ua pèça mès der engranatge entà defener-les. S’èm ací ei pr’amor que volem governar en tot aubedir, en tot arrecuélher era constatacion qu’aguest sistèma coma l’auem coneishut enquia ara non se ten mès. En definitiva, volem méter es institucions d’aguest país ath servici des ciutadans.

D’a on partim?

Era egalitat d’oportunitats, era redistribucion dera riquesa e era coesion sociau son e seràn es signes dera nòsta vida e d’un país melhor. Hem ara un pas tà deuant entà tornar era etica ara politica e tanben entà qu’es persones que non an agut sa votz enquia ara non demoren endarrèr. Metem per deuant deth blocatge, a on mos a amiat eth processisme, objectius concrèts que non pòden demorar. Eth municipalisme ei era nòsta origina e hèr qu’era politica sigue apròp des ciutadans, era nòsta guida.

Com seguim?

Eth 29 de gèr haram un acte que serà eth senhau de partença deth procès de participacion presenciau e digitau, que toti son convidadi a participar, entà pensar amassa se com articular e bastir aguest nau espaci politic e sociau qu’a d’èster un estrument entà caminar de cap a un país mès just, democratic e diuèrs.

Entà conéisher toti es detalhs seguís damb atencion es nòsti hilats e dèisha-mos eth tòn corrèu electronic entà que pogam informar-te des hites que vien.

A compdar de hereuèr auràn lòc talhèrs en diferenti endrets deth territòri e tanben se poderà participar enes debats a trauès dera plataforma de participacion. Es talhèrs e es debats s’estructuraràn ar entorn d’aguesti 6 èishi:

1. Un nau modèl economic e ecologic basat sus eth ben comun.

2. Un nau modèl de benèster entà ua societat justa e egalitària.

3. Un país frairau e sobeiran en toti es encastres.

4. Ua revolucion democratica e feminista.

5. Un país inclusiu a on i age lòc entà toti.

6. Un projècte de país dempús de toti es territòris.

Ena fin de març celebraram ua assemblada constituenta entà debàter e validar es resultats deth procès participatiu, e establir es objectius politics e eth modèl de país que defenerà aguest nau espaci politic qu’ara començam a bastir.